ការឆ្លុះបញ្ចាំងពីដំណើរកម្សាន្ដបុគ្គលិកប្រចាំឆ្នាំដំបូងក្នុងរយៈពេលបួនឆ្នាំ!
ខែតុលា 2, 2023
ការប្រារព្ធពិធីអបអរពិធីបុណ្យអុំទូក អកអំបុក សំពះព្រះខែ!
ខែវិច្ឆិកា 21, 2023
ឈានដល់ចុងឆ្នាំ២០២៣ យើងពិតជារីករាយណាស់ដែលបានដឹងថា យើងនឹងឈានដល់ចំណុចសំខាន់មួយក្នុងបេសកកម្ម ក្នុងការគាំទ្រយុវជននៅក្នុងសហគមន៍របស់យើង។ យើងមានកិត្តិយសក្នុងការចែករំលែកឱ្យលោកអ្នកបានដឹងថា តាមរយៈការគាំទ្រ របស់ម្ចាស់ជំនួយ និងភាគីពាក់ព័ន្ធ ជាពិសេសមូលនិធិ iHerb Charitable Foundation មូលនិធិ Phoenix Foundation និងសាលា DPETNS យើងអាចចាប់ផ្តើមកម្មវិធីអាហារូបករណ៍សម្រាប់ការសិក្សាថ្នាក់ឧត្តមសិក្សា (SHE) នៅក្នុងឆ្នាំ ២០១២ ហើយមកទល់ពេលនេះយើងបានជ្រើសរើសសិស្សអាហារូបករណ៍ជាង៣០០នាក់។
ដើម្បីទទួលស្គាល់សមិទ្ធផលនេះ យើងចង់ឆ្លុះបញ្ចាំងពីផលជះបែបវិជ្ជមាននៃកម្មវិធីរហូតមកដល់ពេលបច្ចុប្បន្ន និងចែករំលែកក្តីសង្ឃឹមរបស់យើងសម្រាប់កម្មវិធីឆ្ពោះទៅមុខ។
តើកម្មវិធីអាហារូបករណ៍សម្រាប់ថ្នាក់ឧត្តមសិក្សា (SHE) គឺជាកម្មវិធីអ្វី?
កាលពី១០ឆ្នាំមុន នៅពេលដែលផេពភី បានចាប់ផ្តើមកម្មវិធីអាហារូបករណ៍សម្រាប់ថ្នាក់ឧត្តមសិក្សា SHE យុវជនកម្ពុជានៅជនបទមានជម្រើសតិចតួចក្នុងការទទួលបានការអប់រំថ្នាក់ឧត្តមសិក្សា។ នៅក្នុងគម្រោងគ្រប់គ្រងក្តីប្រាថ្នារបស់យើង មន្ត្រីគ្រប់គ្រងក្ដីប្រាថ្នាបានធ្វើការនៅក្នុងវិទ្យាល័យជនបទ និងដាច់ស្រយាល ដោយជំរុញឱ្យយុវជនបន្ដការរៀនសូត្រនៅសាលា និងកំណត់ផ្លូវទៅការសិក្សាថ្នាក់ឧត្តមសិក្សា និងការបណ្តុះបណ្តាលវិជ្ជាជីវៈ។ ឱកាសអាហារូបករណ៍ភាគច្រើនពីស្ថាប័ន និងអង្គការមិនមែនរដ្ឋាភិបាល ផ្តល់ជូនត្រឹមតែការបង់ថ្លៃការសិក្សា និងការបណ្តុះបណ្តាលខ្លះប៉ុណ្ណោះ។ វាបានបង្ហាញឡើងថា កម្មវិធីអាហារូបករណ៍ភាគច្រើនមិនផ្តល់ជំនួយហិរញ្ញវត្ថុឬថវិកាសរុបគ្រប់គ្រាន់សម្រាប់យុវជនជនបទ និងយុវជនដែលជួបការលំបាកខាងហិរញ្ញវត្ថុនោះឡើយ។ យើងបានយល់ឃើញថា យើងចាំបាច់ផ្តល់អាហារូបករណ៍ដ៏ទូលំទូលាយ ដែលនឹងធានាថា យុវជនដែលប្តេជ្ញាចិត្តចំពោះការសិក្សា មិនថាមកពីមូលដ្ឋានខាងហិរញ្ញវត្ថុបែបណា នឹងអាចចូលរៀនបានជោគជ័យនៅសាកលវិទ្យាល័យ ឬសាលាវិជ្ជាជីវៈនៅទីក្រុងសៀមរាប។
ដោយយល់ឃើញបែបនេះ យើងបានបង្កើតកម្មវិធីអាហារូបករណ៍ផ្ដល់ជូនសិស្សអាហារូបការណ៍សម្រាប់ការស្នាក់នៅ ការថែទាំសុខភាព និងការថែទាំសុខភាពផ្លូវចិត្ត ថ្លៃសិក្សា មធ្យោបាយធ្វើដំណើរ ប្រាក់ឧបត្ថម្ភការរស់នៅ និងថ្លៃសិក្សាបន្ថែម។ យើងក៏បានធ្វើការដើម្បីផ្សារភ្ជាប់ផ្នែកបច្ចេកវិទ្យា និងសង្គម ដែលយុវជនជនបទនឹងប្រឈមមុខ នៅពេលដែលពួកគេការផ្លាស់ប្តូរចូលទៅក្នុងទីក្រុង ក្នុងឆ្នាំទី១នូវការអភិវឌ្ឍន៍ជំនាញវិជ្ជាជីវៈ និងជំនាញទន់នៅក្នុងមជ្ឈមណ្ឌលបណ្ដុះបណ្ដាលរបស់យើង។
ក្នុងអំឡុងឆ្នាំទីមួយ យើងបានណែនាំសិស្សក្នុងការកំណត់សាកលវិទ្យាល័យ ឬមជ្ឈមណ្ឌលបណ្តុះបណ្តាលដែលបំពេញតម្រូវការរបស់ពួកគេបានល្អបំផុត ខណៈពេលដែលក្រុមការងារមជ្ឈមណ្ឌលបណ្ដុះបណ្ដាលផ្តល់សមត្ថភាពដល់យុវជនឱ្យក្លាយជាអ្នកដឹកនាំគម្រោងដោយមានទំនុកចិត្ត និងជាអ្នកផ្លាស់ប្តូរដែលត្រៀមខ្លួនដើម្បីឈានមុខក្នុងវិស័យអាជីពការងារដែលពួកគេបានជ្រើសរើស។ តាមរយៈការងាររបស់យើងតាមកន្លងមក (ក្រៅពីវិបត្តិសេដ្ឋកិច្ចរាតត្បាតពីពាក់កណ្តាលឆ្នាំ២០២០ ដល់ពាក់កណ្តាលឆ្នាំ២០២២) ជាង៩៩% នៃសិស្សអាហារូករណ៍របស់យើងបានទទួលការងារក្នុងរយៈពេល៦ ខែបន្ទាប់ពីបញ្ចប់ការសិក្សាពីមជ្ឈមណ្ឌលបណ្ដុះបណ្ដាល។
ឥទ្ធិពលនៃអាហារូបករណ៍សម្រាប់កម្មវិធីឧត្តមសិក្សា
បន្ទាប់ពីជាងមួយទសវត្សរ៍នៃការជួយឱ្យយុវជនកំណត់ចំណង់ចំណូលចិត្តរបស់ពួកគេ និងដឹកនាំគម្រោងអភិវឌ្ឍន៍សហគមន៍ឱ្យមានការផ្លាស់ប្តូរ កម្មវិធីនេះបានជួយសមាជិកសហគមន៍ជនបទរាប់រយនាក់ ចាប់ផ្តើមយល់ដឹង និងទទួលស្គាល់ពីសារៈសំខាន់នៃការសិក្សា។ ឧទាហរណ៍ នៅក្នុងឆ្នាំកន្លងទៅនេះ សិស្សអាហារូបករណ៍របស់យើង បានធ្វើការជាមួយនិងយុវជនមជ្ឈមណ្ឌលបណ្ដុះបណ្ដាល ដើម្បីអនុវត្តគម្រោង អភិវឌ្ឍន៍បណ្ណាល័យ សុខភាព និងអនាម័យ និងគម្រោងគ្រប់គ្រងសំរាម ដោយមានភាពជាដៃគូ ជាមួយនឹង ថ្នាក់ដឹកនាំសហគមន៍មូលដ្ឋាន។ តាមរយៈការងារក្នុងគម្រោង ពួកគេបានទៅដល់ សាលារៀនបឋមសិក្សា អនុវិទ្យាល័យ និងមជ្ឈមណ្ឌលស្រុកជាច្រើន ដែលជំរុញឱ្យមនុស្សរាប់ពាន់នាក់ ចូលរួមដោះស្រាយបញ្ហាដែលពួកគេបានឃើញនៅក្នុងសហគមន៍របស់ពួកគេ និងបន្តការសិក្សារបស់ពួកគេ ព្រោះថ្ងៃណាមួយពួកគេអាចដឹកនាំគម្រោងសម្រាប់ការអភិវឌ្ឍន៍នេះ។
សូមឈ្វេងយល់បន្ថែមអំពីគម្រោងបណ្ណាល័យថ្មីៗ របស់យើង តាមរយៈការទស្សនាវីដេអូខាងក្រោម៖
លើសពីនេះទៅទៀត អតីតសិស្ស និងសិស្សអាហារូបករណ៍របស់យើង គាំទ្រកិច្ចខិតខំប្រឹងប្រែងរបស់មន្រ្តីក្តីគ្រប់គ្រងក្ដីប្រាថ្នារបស់យើង ដោយចូលរួម និងធ្វើជាវាគ្មិនក្នុងព្រឹត្តិការណ៍ផ្សេងៗប្រចាំវិទ្យល័យដៃគូ អំពីរបៀបត្រៀមខ្លួនសម្រាប់ថ្នាក់ឧត្តមសិក្សា និងការចូលទៅកាន់អាជីពជំនាញដែលបានផ្លាស់ប្តូរជីវិតរបស់ពួកគេ។ ព្រឹត្តិការណ៍និយាយជាសាធារណៈមួយ បានជំរុញ សិស្សានុសិស្សរាប់រយនាក់ ឱ្យផ្ដល់អាទិភាពដល់ការសិក្សារបស់ពួកគេជាចម្បង។
ជាចុងក្រោយ អតីតសិស្សអាហារូបករណ៍ និងសិស្សអាហារូបករណ៍ដែលយើងបានជ្រើសរើស បានក្លាយទៅជាគំរូដ៏សំខាន់និង ជារឿងរ៉ាវជោគជ័យនៅក្នុងសហគមន៍របស់ពួកគេ ។ សិស្សអាហារូបករណ៍ ភាគច្រើន គឺជាមនុស្សដំបូងក្នុងគ្រួសារ និងជាមនុស្សដំបូងនៅភូមិរបស់ពួកគេ ដែលបានរៀនបន្ដក្នុងថ្នាក់ឧត្តមសិក្សា។ នៅក្នុងភូមិរបស់ពួកគេ ពួកគេគឺជាអ្នកត្រួសត្រាយផ្លូវ ជោគជ័យសម្រាប់អ្នកដទៃឱ្យយកគំរូតាមដោយការខិតខំប្រឹងប្រែងរៀនសូត្រ។
លើសពីការធានានូវការងារដែលមានស្ថេរភាព អតីតសិស្សអាហារូបករណ៍របស់យើងជាច្រើនបានជ្រើសរើសក្នុងការវិលត្រឡប់ទៅសហគមន៍របស់ពួកគេ ឬបម្រើនៅក្នុងតំបន់ដែលមិនមានការអភិវឌ្ឍន៍ផ្សេងទៀត ក្នុងនាមជាអ្នកដឹកនាំ អ្នកផ្ដល់ការអប់រំ និងជាអ្នកនយោបាយថែមទៀតផង! អតីតសិស្សទាំងអស់របស់យើងបានរំលឹកដល់សមាជិកក្នុងសហគមន៍ថា អនាគតដ៏ល្អប្រសើរបំផុតគឺអាចទៅរួចសម្រាប់យុវជនជនបទ ក្រៅពីការរៀបការទាំងវ័យក្មេង ការងារខុសច្បាប់ និងកសិកម្មសម្រាប់តែចិញ្ចឹមជីវិត។
បច្ចុប្បន្ននេះ តំបន់គោលដៅជាច្រើនរបស់យើងបានកាត់បន្ថយអត្រាបោះបង់ការសិក្សានៅវិទ្យាល័យ កាត់បន្ថយករណីរៀបការទាំងវ័យក្មេង និងធនធានសុខភាព និងការអប់រំកើនឡើង។
ផែនការសម្រាប់អនាគតរបស់ផេពភី
ទៅមុខទៀត យើងសង្ឃឹមថានឹងពង្រឹងនការគាំទ្រសហគមន៍ អាហារូបករណ៍ផេពភី ឱ្យបានល្អប្រសើរឡើង ខណៈដែលកម្លាំងខាងក្រៅ និងសកលជាច្រើន នៅតែបន្តប៉ះពាល់ដល់សិស្សអាហារូបករណ៍ និងអតីតសិស្ស លើសុខុមាលភាព និងសមត្ថភាពសិក្សារបស់ពួកគេ។ ដោយសារសិស្សអាហារូបករណ៍របស់យើងស្ទើរតែទាំងអស់មកពីសហគមន៍កសិកម្ម គ្រួសាររបស់ពួកគេប្រឈមមុខនឹងការឡើងកំដៅផែនដីយ៉ាងខ្លាំង ហើយសុខភាពនៃដំណាំ និងការស្តុកទុករបស់ពួកគេបានរងផលប៉ះពាល់យ៉ាងខ្លាំង។ លទ្ធផលនេះបង្កើនភាពតានតឹងផ្នែកហិរញ្ញវត្ថុសម្រាប់គ្រួសាររបស់សិស្សអាហារូបករណ៍របស់យើង។ រៀងរាល់ឆ្នាំវាពិតជាលំបាកណាស់ ការបញ្ចុះបញ្ចូលអាណាព្យាលបាលសិស្សឱ្យវិនិយោគលើការអប់រំរបស់កូនពួកគេ ផ្ទុយពីបញ្ជូនឱ្យកូនរបស់គាត់ទៅធ្វើការ ឬឱ្យកូនពួកគាត់នៅផ្ទះដើម្បីជួយគ្រួសារ។ ដូចគ្នានេះផងដែរ ទោះបីជាសេដ្ឋកិច្ចក្នុងស្រុកបានចាប់ផ្តើមស្ទុះងើបឡើងវិញពីជំងឺរាតត្បាតក៏ដោយ យើងបានស៊ូទ្រាំនឹងភាពអត់ការងារធ្វើរីករាលដាលជិតបីឆ្នាំ ដែលប៉ះពាល់ដល់ទំនុកចិត្តរបស់គ្រួសារចំពោះការអប់រំថ្នាក់ឧត្តមសិក្សា និងការងារជំនាញ។ យើងនៅតែធ្វើការគ្រប់គ្រងការខូចខាត ហើយអតីតសិស្ស និងសិស្សអាហារូបករណ៍ និងក្រុមការងារកំពុងធ្វើការ ដើម្បីភ្ជាប់ជាមួយសហគមន៍ ក្នុងការជួយមនុស្សឱ្យយល់ថា ទោះបីជាមានរយៈពេលនៃការគ្មានការងារធ្វើក៏ដោយ ក៏យុវជនវ័យក្មេងដែលមានការអប់រំ នឹងនៅតែមានជីវភាពល្អប្រសើរជាងនេះក្នុងរយៈពេលវែង។
ក្រៅពីកត្តាសកលយុវជននៅក្នុងកម្មវិធីរបស់យើងប្រឈមមុខ នឹងបញ្ហាផ្ទាល់ខ្លួន និងបញ្ហាសុខភាពជាច្រើន ដែលអាចប៉ះពាល់ដល់ពិន្ទុនៃការសិក្សា និងវត្តមានរបស់ពួកគេ។ ក្នុងរយៈពេលប៉ុន្មានឆ្នាំចុងក្រោយនេះ ក្រុមការងាររបស់យើងបានដាក់ការយកចិត្តទុកដាក់យ៉ាងខ្លាំងទៅលើការថែទាំសុខភាពផ្លូវចិត្ត ការបង្កើនសេវាកម្មសុខភាពមាត់ធ្មេញ និងការកសាងសហគមន៍ ដើម្បីជួយសិស្សអាហារូបករណ៍ទាំងអស់ក្នុងអំឡុងពេលវិបត្តិឬបញ្ហាណាមួយដែលពួកគេកំពុងប្រឈម។ កិច្ចខិតខំប្រឹងប្រែងរបស់យើងរួមមាន ការបើកក្លឹបសង្គម ការប្រកួតកីឡា កម្មវិធីបង្រៀន កម្មវិធីប្រឹក្សាយោបល់ និងការចុះទស្សនកិច្ចក្នុងការសាកសួរនិយោជក។
ក្នុងរយៈពេលប៉ុន្មានឆ្នាំខាងមុខនេះ ក្រុមការងាររបស់យើងកំពុងផ្តោតលើការកសាងបណ្តាញ ដើម្បីអភិវឌ្ឍកម្មវិធីបណ្តុះបណ្តាល និងការអភិវឌ្ឍន៍អាជីពជាមួយក្រុមហ៊ុន និងអង្គការជាច្រើន ដែលស្របទៅនឹងគុណតម្លៃរបស់យើង នៅក្នុងតំបន់ និងនៅទីក្រុងភ្នំពេញ។ យើងក៏កំពុងធ្វើការងារជិតស្និទ្ធជាមួយអតីតនិស្សិតអាហារូបករណ៍ ដើម្បីសម្របសម្រួលកិច្ចខិតខំប្រឹងប្រែងរបស់យើងឱ្យបានល្អបំផុតក្នុងការផ្សារភ្ជាប់អតីតសិស្ស និងសិស្សអាហារូបករណ៍ និងកំណត់ថាតើយើងអាចធ្វើការអ្វីខ្លះជាមួយគ្នាដើម្បីពង្រឹងធនធាននៃកម្មវិធីអាហារូបករណ៍សម្រាប់កម្មវិធីឧត្តមសិក្សា របស់យើងដើម្បីឱ្យវាអាចវិវត្តន៍និងអាចបំពេញតម្រូវការបច្ចុប្បន្នរបស់យុវជន។
សរុបសេចក្ដី
ជាការឆ្លុះបញ្ចាំង យើងពិតជាស្ញប់ស្ញែងចំពោះអ្វីដែលសិស្សអាហារូករណ៍ និងក្រុមការងាររបស់យើងសម្រេចបានតាមរយៈកម្មវិធីអាហារូបករណ៍ថ្នាក់ឧត្តមសិក្សាSHE។ យើងសូមថ្លែងអំណរគុណយ៉ាងស្មោះអស់ពីចិត្តចំពោះម្ចាស់ជំនួយ ភាគីពាក់ព័ន្ធ និងសមាជិកសហគមន៍ទាំងអស់ ដែលបានជួយធ្វើឱ្យយើងបានរៀបចំ និងបង្កើតកម្មវិធីដែលអាចឱ្យយុវជនរាប់រយនាក់ឈានដល់សក្តានុពលរបស់ពួកគេ និងធ្វើតាមក្តីសុបិនរបស់ពួកគេចង់បាន។
រាល់ការជួយគាំទ្រគ្រប់ដុល្លារទាំងអស់ដែលយើងទទួលបាន ជួយយើងក្នុងការបង្កើតអនាគតអ្នកដឹកនាំថ្មី។ អបអរសាទរសហគមន៍របស់យើងដែលទទួលបានអាហារូបករណ៍ជាង៣០០នាក់ យើងសូមថ្លែងអំណរគុណយ៉ាងជ្រាលជ្រៅចំពោះការបរិច្ចាគនៅថ្ងៃនេះរបស់លោកអ្នក ជួយយើងឱ្យបានបន្តកម្មវិធីអាហារូបករណ៍របស់យើង និងដើម្បីគាំទ្រសិស្សអាហារូបកណ៍ នាពេលអនាគត!
